MANILA, Philippines – Hiniling ni Senador Win Gatchalian sa susunod na administrasyon na tutukan ang problema ng mga kabataang Pilipino pagdating sa stunting o ang hindi paglaki ng isang bata ayon sa kanyang edad, lalo na’t may matagal na pinsalang idinudulot ito sa kanilang paglaki.
Kamakailan lang ay nagsumite ang Duterte administration ng aplikasyon para sa isang World Bank loan na nagkakahalaga ng 178.1 milyong dolyar. Ang naturang loan ay gagamitin upang tugunan ang stunting sa mga kabataang Pilipino. Ang panukalang proyekto ay pangungunahan ng Department of Health (DOH) at Department of Social Welfare and Development (DSWD).
Binigyang diin ni Gatchalian ang pangmatagalang pinsalang dulot ng stunting sa kakayahan ng mga kabataang matuto, bagay na nakakaapekto sa kanilang performance sa paaralan. Binalikan ni Gatchalian ang sinabi ng World Bank (WB) noon na ang learning poverty sa bansa ay kasalukuyang nasa 90.5 porsyento. Katumbas nito ang siyam sa sampung batang may edad na sampu na hindi marunong bumasa o umintindi ng simpleng kwento.
Ayon sa ulat ng WB na pinamagatang “Undernutrition in the Philippines: Scale, Scope, and Opportunities for Nutrition Policy and Programming,” may 30 porsyento sa mga batang Pilipino na mas bata sa limang taong gulang ay maituturing na stunted o maliit para sa kanilang edad.
Para kay Gatchalian, dapat tiyakin ng susunod na administrasyon ang epektibong pagpapatupad ng Republic Act No. 11148 o ang Kalusugan at Nutrisyon ng Mag-Nanay Act na kilala rin bilang First 1,000 Days Law. Layon ng batas na tutukan ang pangangailangang pang-nutrisyon ng mga sanggol sa unang isang libong (1,000) araw ng kanilang buhay. Si Gatchalian ay co-author ng naturang batas.
Ayon sa World Health Organization (WHO), ang stunting ay epekto ng kakulangan sa nutrisyon at paulit-ulit na pagkakasakit o impeksyon sa unang isang libong araw ng buhay ng bata.
“Mahalagang tutukan natin ang kalusugan at nutrisyon ng mga bata mula sa panahong ipinagbubuntis sila, lalo na’t malaki ang epekto nito sa kanilang kakayahang matuto. Kailangang tiyakin natin na may sapat na partisipasyon at kakayahan ang ating mga komunidad, kabilang ang mga lokal na pamahalaan, upang pangalagaan ang kalusugan ng kabataang Pilipino,” ani Gatchalian.
Noong 2018, inirekomenda ng Philippine Institute for Development Studies (PIDS) ang mga hakbang tulad ng dagdag investment sa pagkalap ng datos, pagtukoy sa mga benepisyaryo ng programa, pinaigting na sistema ng monitoring at evaluation, at agarang technical assistance mula sa national government at development partners.
