Ginpili ni presumptive president Ferdinand Bongbong Marcos, Jr. si Philippine Competition Commission chairperson Arsenio Balisacan agud magpamuno sa National Economic and Development Authority (NEDA).
Suno kay Marcos, nakaupod kag nakatrabaho niya si Balisacan sang nagapungko pa siya bilang gobernador.
Buslan ni Balisacan si outgoing NEDA director-general kag Socioeconomic Planning Secretary Karl Kendrick Chua.
Ginpahayag naman ni Balisacan nga ginbaton niya ang tanyag ni Marcos.
Si Balisacan amo man ang former NEDA director-general kag Socioeconomic Planning Secretary nga nagserbe halin sang 2012 tubtub 2016.
Ginpahayag sini nga gina-look forward niya ang pag-trabaho kaupod ang economic team kag ang private sector agud mabalik ang pungsod sa pre-pandemic high-growth trajectory, mapanubo ang lebel sang kapigaduhon sa Pilipinas kag mabuhinan ang socioeconomic inequality.
Nagserbe si Balisacan bilang Board Chairman sang Philippine Institute for Development Studies kag siya man ang first Board Chairperson sang Philippines Statistics Authority kag Public-Private Partnership Center of the Philippines.
Nakatudlo man ini sang development economics sa University of the Philippines.
May PhD ini sa Economics sa University of Hawaii, MS in Agriculture sa University of the Philippines Los Baños kag BS in Agriculture sa Mariano Marcos State University.
Ginpahayag naman ni Marcos nga hulat-hulaton lang anay ang anunsyo kun sanday sin-o ang magakumpleto sa economic team sa idalom sang iya nga administrasyon.
